Elpress.az xəbər verir ki, sentyabrın 7-11-də Bakı Konqres Mərkəzində BMT-nin İqlim Dəyişmələri üzrə Çərçivə Konvensiyasının (UNFCCC) 4-cü İqlim Həftəsi və Bakı İqlim Fəaliyyəti Həftəsi keçirilib.
Azərbaycanın ev sahibliyi və təşkilatçılığı ilə baş tutan tədbirlər çərçivəsində ümumilikdə 68 tədbir təşkil olunub. Proqrama 140-dan çox ölkədən 2700-ə yaxın nümayəndə qatılmaq üçün qeydiyyatdan keçib.İqlim həftəsində dövlət qurumlarının təmsilçiləri ilə yanaşı, beynəlxalq təşkilatların, qeyri-hökumət təşkilatlarının, özəl sektorun və akademik dairələrin nümayəndələri də iştirak ediblər.UNFCCC-nin İqlim Həftəsi çərçivəsində beynəlxalq iqlim gündəliyinin müxtəlif istiqamətləri üzrə 8 mandatlı iclas keçirilib. Həmçinin COP30 və COP31 sədrliyinin tədbirləri, eləcə də UNFCCC-nin İcra Forumu çərçivəsində müxtəlif sessiyalar təşkil olunub.Bakı İqlim Fəaliyyəti Həftəsi çərçivəsində isə Azərbaycanın COP29 Sədrliyinin Fəaliyyət Gündəliyinə uyğun olaraq və digər aktual məsələlər üzrə 37 tədbir keçirilib.Həftə çərçivəsində Azərbaycan, Braziliya, Türkiyə və Avstraliyanın iştirakı ilə Milli Adaptasiya Planları (NAP) və Milli Səviyyədə Müəyyən Edilmiş Töhfələrin (NDC) icrasına dair “Belém Missiyası 1.5” Troykasının mandatı üzrə məsləhətləşmələr də aparılıb.
Qeyd edək ki, UNFCCC İqlim Həftələri BMT-nin regional qrupları arasında rotasiya prinsipi əsasında keçirilir. 2026-cı ilin ilk İqlim Həftəsi aprel ayında Asiya və Sakit Okean regionu üzrə Koreya Respublikasında, ikinci tədbir isə Şərqi Avropa regionu üzrə Azərbaycanda təşkil olunub.
