Bakı metrosunda sərnişinlərin rahatlığı və təhlükəsizliyinin artırılması istiqamətində mühüm yenilənmə işləri davam etdirilir.
Elpress.az xəbər verir ki, metropolitenin stansiya və tunellərində daha 6 müasir tipli havalandırma sistemi quraşdırılıb.
Bildirilib ki, yeni nəsil ventilyatorlar Bakı Metropoliteninin mikroiqlim və geoloji xüsusiyyətləri nəzərə alınaraq istehsal edilib. Yeni avadanlıqların tətbiqi nəticəsində stansiya və tunellərdə temperaturun aşağı salınması, havanın 2-3 dəfə daha intensiv yenilənməsi və sərnişinlər üçün daha komfortlu mühitin yaradılması təmin olunacaq.
Qeyd edilib ki, havalandırma sistemləri dispetçer mərkəzindən avtomatlaşdırılmış qaydada idarə olunur. Bununla yanaşı, yeni avadanlıqlar elektrik enerjisinə qənaət etməsi ilə də seçilir.
Bakı Metropoliteni vurğulayıb ki, sərnişin məmnuniyyətinin artırılması məqsədilə infrastrukturun müasirləşdirilməsi və təhlükəsizlik tədbirlərinin gücləndirilməsi istiqamətində yenilənmə işləri mərhələli şəkildə davam etdiriləcək.
