Elpress.az xəbər verir ki, 14 il müddətinə azadlıqdan məhrum edilən Prezident Administrasiyasının sabiq rəhbəri Ramiz Mehdiyevlə bağlı müsadirə olunacağı bildirilən əmlakların siyahısında torpaq sahələri, villalar, kommersiya obyektləri, şirkətlər və bank sektorundakı paylar yer alıb.
Siyahıya əsasən, əmlaklar Ramiz Mehdiyev və ailə üzvləri ilə əlaqələndirilir.
Torpaq sahələri və bağlar
Siyahıda Novxanıda üzüm bağları, Bakı, Abşeron və Goranboy rayonlarında ümumilikdə 216 hektar kənd təsərrüfatı torpağı, Novxanıda 155 hektar və Xınalıq kəndində 50 hektar torpaq sahəsi qeyd olunur. Həmçinin Qalina Mehdiyevanın adına Maştağada 892 sot, Kamila Əliyevanın adına isə 240 sot torpaq olduğu bildirilir.
Şirkətlər və kommersiya obyektləri
Əmlak siyahısında “Digital Media” MMC, “İnfonet” MMC, “Caspian Telekom” MMC, “Topaz” və “Qala-R.L.” MTK-ları, NLT MMC və “Premium Store” MMC-nin adları çəkilir.
Bundan başqa, “Grand Palace”, “Astoriya”, “Astoriya Tibb Mərkəzi” MMC, “Qrandezza Ticarət Mərkəzi”, eləcə də “Sədərək” və “Binə” ticarət mərkəzlərində payların olduğu iddia edilir.
Bank, investisiya və nəşriyyat aktivləri
Siyahıda “BTB” ASC, “BTB Lizinq” ASC və “BTB Kapital İnvestisiya Şirkəti” ASC də yer alıb. “BTB” ASC-nin nizamnamə kapitalının 50 milyon manat olduğu və səhmlərinin 75 faizinin Ramiz Mehdiyevin nəvəsinə məxsus olduğu bildirilir.
Həmçinin “Şərq-Qərb Nəşriyyat Evi” MMC, “Qlobal East West” MMC və Xətai rayonunun Əhmədli qəsəbəsində yerləşən yaşayış binaları qeyd olunur.
Villalar və bağ evləri
Siyahıya Bakının Tbilisi prospektində, 36 sot ərazidə yerləşən və satış qiymətinin 8 milyon dollar olduğu bildirilən villa, eləcə də Göyçay, Şamaxı və Göygöl rayonlarındakı bağ evləri daxil edilib.
Qeyd edək ki, siyahı mediada yayılan məlumatlara əsaslanır. Əmlakların müsadirəsi ilə bağlı hüquqi qərarın əhatəsi və hər bir əmlak üzrə mülkiyyət məlumatları rəsmi sənədlərlə dəqiqləşdirilməlidir.
