Azərbaycanda rəqəmsal mühitin təhlükəsizliyinin təmin olunması və kibertəhdidlərə qarşı dayanıqlı sistemin formalaşdırılması dövlət siyasətinin əsas istiqamətlərindən biri kimi qiymətləndirilir.
Elpress.az APA-Economics-ə istinadən xəbər verir ki, bunu Rasim Əliquliyev Bakıda keçirilən IV Milli Kibertəhlükəsizlik Forumunda çıxışı zamanı deyib.Onun sözlərinə görə, son illərdə ölkədə rəqəmsal transformasiyanın sürətlənməsi, elektron xidmətlərin genişlənməsi və müasir texnologiyaların tətbiqinin artması kibertəhlükəsizlik məsələlərini daha da ön plana çıxarıb.Rasim Əliquliyev bildirib ki, həyata keçirilən dövlət siyasəti nəticəsində rəqəmsal platformalardan istifadənin miqyası genişlənib və dövlət xidmətlərinin elektron müstəviyə keçirilməsi prosesi əhəmiyyətli dərəcədə sürətlənib.İnstitut rəhbəri vurğulayıb ki, bu şəraitdə milli kibertəhlükəsizlik ekosisteminin yaradılması, onun davamlılığının təmin edilməsi və informasiya infrastrukturunun etibarlı mühafizəsi xüsusi əhəmiyyət kəsb edir.Onun fikrincə, sözügedən sistemin əsas vəzifələri rəqəmsal dövlət institutlarının təhlükəsiz fəaliyyətini təmin etmək, informasiya resurslarını mümkün risklərdən qorumaq və dövlət qurumlarının kibertəhdidlərə qarşı hazırlıq səviyyəsini yüksəltməkdən ibarətdir.
