İstanbulda keçirilən “Sıfır Tullantı Forumu 2026” çərçivəsində kənd təsərrüfatı və ərzaq təhlükəsizliyinə həsr olunmuş yüksək səviyyəli nazirlər toplantısı baş tutub.
Elpress.az AZƏRTAC-a istinadən xəbər verir ki, tədbirdə Azərbaycanı kənd təsərrüfatı naziri Məcnun Məmmədov təmsil edib.Nazir çıxışında qlobal ərzaq təhlükəsizliyinin möhkəmləndirilməsi, kənd təsərrüfatında dayanıqlılığın artırılması və məhsul itkilərinin minimuma endirilməsinin vacibliyini vurğulayıb. O bildirib ki, aqro-logistika, müasir saxlama sistemləri, nəqliyyat infrastrukturu və rəqəmsal həllərə yatırılan investisiyalar bu sahədə mühüm rol oynayır.Məcnun Məmmədovun sözlərinə görə, süni intellekt və ağıllı idarəetmə texnologiyalarının tətbiqi məhsulların təchizat zəncirində daha səmərəli hərəkətinə, itkilərin azalmasına və resurslardan daha effektiv istifadəyə şərait yaradır.Nazir həmçinin qeyd edib ki, Azərbaycan aqrar sektorda ərzaq itkilərinin azaldılması və dəyər zəncirinin gücləndirilməsi istiqamətində ardıcıl tədbirlər həyata keçirir.Forum çərçivəsində kənd təsərrüfatında innovasiyalar, ağıllı logistika, beynəlxalq ticarət siyasətləri və ərzaq təhlükəsizliyi ilə bağlı panel müzakirələr də təşkil olunub. Tədbirdə dünyanın müxtəlif ölkələrindən hökumət nümayəndələri, ekspertlər və beynəlxalq təşkilatların təmsilçiləri iştirak ediblər.
