Azərbaycan ərazisinin 13 faizdən çoxunun mina və partlamamış hərbi sursatlarla çirkləndiyi açıqlanıb
Elpress.az xəbər verir ki, Azərbaycan Prezidentinin xüsusi tapşırıqlar üzrə nümayəndəsi Elçin Əmirbəyov ölkədə minatəmizləmə fəaliyyətinə beynəlxalq dəstəyin daha da artırılmasının vacibliyini vurğulayıb.O, Bakıda keçirilən “Şəhərlərin bərpası üçün humanitar minatəmizləmə: Təhlükəsiz yaşayış məskənləri üçün mükəmməllik standartlarının müəyyənləşdirilməsi” mövzusunda 4-cü Beynəlxalq Minatəmizləmə Konfransında çıxışı zamanı Azərbaycana bu sahədə dəstək göstərən ölkə və təşkilatlara təşəkkürünü bildirib.Əmirbəyovun sözlərinə görə, göstərilən beynəlxalq dəstəyin həcmi mövcud ehtiyaclarla müqayisədə olduqca aşağıdır. O qeyd edib ki, Azərbaycan ərazisinin 13 faizdən çoxu minalar və partlamamış hərbi sursatlarla çirklənib.Müharibənin başa çatmasından təxminən altı il keçməsinə baxmayaraq, mina təhlükəsi olan ərazilərin 75 faizində hələ də insan həyatı üçün ciddi risk yaradan minaların mövcud olduğu bildirilib.Elçin Əmirbəyov bunu ciddi humanitar və təhlükəsizlik problemi, eyni zamanda keçmiş məcburi köçkünlərin doğma yurdlarına qayıdışı baxımından mühüm maneə kimi qiymətləndirib.O bildirib ki, Azərbaycan hazırda regionda, hətta dünyada ən böyük münaqişədən sonrakı yenidənqurma layihələrindən birini həyata keçirir. Keçmiş məcburi köçkünlərin doğma ərazilərinə qayıtması, yaşayış məntəqələrinin bərpası, yolların, məktəblərin, xəstəxanaların və iqtisadi infrastrukturun yaradılması istiqamətində genişmiqyaslı işlər görülür.Əmirbəyov vurğulayıb ki, ərazilərin altında mövcud olan mina təhlükəsi aradan qaldırılmadan həmin icmaların təhlükəsiz şəkildə yenidən qurulması mümkün deyil.O, Azərbaycanın mina fəaliyyətinə dəstək göstərən bütün ölkə və təşkilatların yardımını yüksək qiymətləndirib. Bildirib ki, bu dəstək yalnız mina qurbanlarına yardım baxımından deyil, həm də Azərbaycanla dostluq və həmrəyliyin göstəricisi kimi qəbul olunur.Bununla yanaşı, Əmirbəyov beynəlxalq maliyyə dəstəyinin hələ də məhdud olduğunu qeyd edib. Onun sözlərinə görə, Azərbaycanda minatəmizləmə fəaliyyətinin maliyyələşdirilməsinin təxminən 95 faizi dövlət vəsaiti hesabına həyata keçirilir, xarici mənbələrin payı isə yalnız 5 faiz təşkil edir.Azərbaycan Prezidentinin xüsusi tapşırıqlar üzrə nümayəndəsi hesab edir ki, bu nisbət dəyişdirilməli və ölkəyə minatəmizləmə sahəsində beynəlxalq dəstəyin həcmi artırılmalıdır.
