Politoloq: Azərbaycan Mərkəzi Asiyada mühüm tərəfdaşlardan birinə çevrilib
Elpress.az xəbər verir ki, Azərbaycanın türk dövlətləri, xüsusilə Mərkəzi Asiya ölkələri ilə münasibətlərində yeni mərhələ müşahidə olunur.Politoloq Zaur Məmmədov AZƏRTAC-a açıqlamasında Azərbaycan-Qırğızıstan əlaqələrinin hazırda yüksək səviyyədə olduğunu və iki ölkə arasında müttəfiqlik münasibətlərinin formalaşdığını bildirib.Onun sözlərinə görə, Dövlətlərarası Şuranın üçüncü iclasının keçirilməsi və liderlər arasında aparılan müzakirələr Bakı ilə Bişkek arasında siyasi əlaqələrin inkişaf etdiyini göstərir.Politoloq Azərbaycanın Mərkəzi Asiya Dövlət Başçılarının Məşvərət Görüşündə iştirakının da ölkənin regiondakı rolunun artmasının göstəricisi olduğunu vurğulayıb. Bildirilib ki, Azərbaycanın 2023-cü ildən platformada qonaq qismində iştirakı, 2025-ci ildən isə tamhüquqlu üzv kimi proseslərə qoşulması regional əməkdaşlıq baxımından əhəmiyyətlidir.Z.Məmmədovun fikrincə, Azərbaycanla türk dövlətləri arasında əməkdaşlığın genişlənməsi Cənubi Qafqaz və Mərkəzi Asiya arasında inteqrasiyanın dərinləşməsinə şərait yaradır. O, bu proseslərin regional sabitlik, təhlükəsizlik və qarşılıqlı iqtisadi əlaqələrin inkişafı baxımından strateji əhəmiyyət daşıdığını qeyd edib.
