Azərbaycan Mərkəzi Bankında yeni təyinat həyata keçirilib.
Elpress.az xəbər verir ki, Mərkəzi Bankın Pul siyasəti departamentinin direktoru Azər Məlağırov qurumun baş direktoru vəzifəsinə təyin olunub. Bununla da AMB-də baş direktorların sayı yenidən 10-a yüksəlib.
Azər Məlağırov bu vəzifədə avqust ayında fəaliyyətini dayandıran Vüqar Əhmədovu əvəz edib.
1977-ci ildə Bakıda anadan olan A.Məlağırov 1997-ci ildə Azərbaycan Dövlət İqtisad İnstitutunda “İqtisadiyyatın tənzimlənməsi” ixtisası üzrə bakalavr, 1999-cu ildə isə magistr təhsili alıb.
O, əmək fəaliyyətinə 1997-ci ildə Mərkəzi Bankda başlayıb. Müxtəlif illərdə pul-kredit və monetar siyasət istiqamətində müxtəlif vəzifələrdə çalışan Məlağırov şöbə rəisi və departament direktor müavini kimi də fəaliyyət göstərib.
2009-cu ilin iyunundan etibarən isə Mərkəzi Bankın Pul siyasəti departamentinə rəhbərlik edib.
