XİN rəhbəri sülh prosesinin tamamlanması üçün Ermənistanda yeni Konstitusiyanın qəbulunu gözlədiklərini bildirib
Elpress.az xəbər verir ki, Xarici işlər naziri Ceyhun Bayramov Azərbaycan-Ermənistan münasibətlərinin normallaşması çərçivəsində Ermənistanda aparılan konstitusiya dəyişiklikləri ilə bağlı prosesin Bakı tərəfindən izlənildiyini bildirib.Nazirin sözlərinə görə, iki ölkə arasında sülh və normallaşma istiqamətində mühüm addımlar atılıb. Dövlət rəsmiləri və vətəndaş cəmiyyəti nümayəndələri arasında keçirilən görüşlər də bu prosesin göstəricilərindən biridir.Ceyhun Bayramov qeyd edib ki, Vaşinqtonda qəbul edilən Birgə Bəyannamədə sülh prosesinin yekunlaşdırılması üçün Ermənistanda yeni Konstitusiyanın qəbul edilməsinin vacibliyi əksini tapıb. O vurğulayıb ki, bu məsələnin vaxtı və həyata keçirilməsi Ermənistanın daxili proseslərinə aiddir.XİN rəhbəri bildirib ki, Ermənistanın baş naziri seçkilərdən sonra ilin sonuna qədər yeni Konstitusiya mətninin ictimaiyyətə təqdim ediləcəyi ilə bağlı açıqlama verib.Azərbaycanın prosesi diqqətlə izlədiyini deyən Bayramov rəsmi Bakının bu məsələ ilə bağlı mövqeyinin dəyişmədiyini vurğulayıb. O əlavə edib ki, sülh prosesinin tam başa çatdırılması və sülh sazişinin imzalanması üçün Azərbaycanın Ermənistan daxilindəki bu prosesin nəticəsini gözləməsi nəzərdə tutulur.
