İyunun 23-də Azərbaycan Respublikasının Prezidenti İlham Əliyev və Türkmənistan Prezidenti Sərdar Berdiməhəmmədov Şuşa şəhərində inşa edilən birinci yaşayış kompleksində olublar.
Görüş zamanı qonaqlara kompleks barədə məlumat verilib. Bildirilib ki, layihənin təməli 2021-ci ildə Prezident İlham Əliyev tərəfindən qoyulub və ümumi sahəsi təxminən 8 hektara yaxındır. Ərazidə 23 bina inşa edilib və ümumilikdə 450 mənzil istifadəyə verilib.Yaşayış fonduna birotaqlı, ikiotaqlı, üçotaqlı, dördotaqlı və beşotaqlı mənzillər daxildir. Kompleksdə həm keçmiş məcburi köçkünlərin, həm də Şuşada fəaliyyət göstərən dövlət qurumlarının əməkdaşlarının yaşaması təmin olunub.Şəhərdə həyata keçirilən genişmiqyaslı abadlıq və quruculuq işləri nəticəsində yaşıllıqlar salınıb, sakinlərin rahatlığı və istirahəti üçün müasir şərait yaradılıb.
