Azərbaycana qarşı dini-ideoloji təxribatların, kiberhücumların və əlaqələndirilmiş informasiya əməliyyatlarının intensivləşdiyi bildirilib.
Elpress.az xəbər verir ki, bu barədə Milli Məclisin Xarici müdaxilələrə və hibrid təhdidlərə qarşı müvəqqəti komissiyasının yaydığı bəyanatda qeyd olunub.
Sənəddə Azərbaycanın beynəlxalq nüfuzunun artması, enerji təhlükəsizliyinə verdiyi töhfələr, tranzit marşrutlarındakı strateji mövqeyi və ölkədəki siyasi-iqtisadi sabitliyin xarici aktorların diqqətini cəlb etdiyi vurğulanıb.
Komissiyanın bildirdiyinə görə, aidiyyəti dövlət qurumları ilə aparılan araşdırmalar zamanı ictimai rəyi manipulyasiya etmək, cəmiyyətdə qütbləşmə yaratmaq və dövlət institutlarına etimadı zəiflətmək məqsədi daşıyan fəaliyyətlər müəyyən edilib. Bəyanatda bu proseslərdə xarici media qurumlarının, haker qruplarının, saxta hesabların və botların rol oynadığı iddia olunur.
Sənəddə sosial şəbəkələrdə alqoritmlər vasitəsilə yayılan məzmunun insanların mövcud baxışlarını möhkəmləndirə və onları birtərəfli məlumat mühitində saxlaya biləcəyi qeyd edilib. Komissiya hesab edir ki, bu üsullardan milli-mənəvi dəyərləri hədəfə almaq, cəmiyyətdə etnik, dini və siyasi ziddiyyətləri dərinləşdirmək üçün istifadə olunur.
Bəyanatda Azərbaycan cəmiyyətinin bu cür təxribatlara qarşı mövqe sərgilədiyi bildirilib. Komissiya dövlət qurumlarının hibrid təhdidlərə qarşı fəaliyyətini davam etdirəcəyini vurğulayıb və Azərbaycana qarşı kampaniyaları pisləyən dost ölkələrin vətəndaşlarına təşəkkür edib.
