Prezident Salman bin Əbdüləziz Al Səuda Krallıq Elan Edilməsi Günü münasibətilə təbrik məktubu göndərib
Elpress.az xəbər verir ki, Azərbaycan Prezidenti İlham Əliyev Səudiyyə Ərəbistanının Kralı Salman bin Əbdüləziz Al Səuda Krallıq Elan Edilməsi Günü münasibətilə təbrik məktubu ünvanlayıb.Dövlət başçısı məktubunda Səudiyyə Ərəbistanı Kralını və onun simasında ölkə xalqını 23 Sentyabr – Krallıq Elan Edilməsi Günü münasibətilə təbrik edib və xoş arzularını çatdırıb.Prezident Azərbaycan ilə Səudiyyə Ərəbistanı arasındakı münasibətlərin ortaq mənəvi dəyərlər, dini-mədəni bağlılıqlar, dostluq və qardaşlıq prinsipləri əsasında inkişaf etdiyini qeyd edib.Məktubda iki ölkə arasında qarşılıqlı etimad və dəstəyə əsaslanan əməkdaşlığın müxtəlif sahələrdə genişləndiyi vurğulanıb. Enerji, o cümlədən alternativ və bərpaolunan enerji sahəsində Səudiyyə Ərəbistanının “ACWA Power” şirkəti ilə tərəfdaşlığın genişləndiyi bildirilib.İlham Əliyev Azərbaycan və Səudiyyə Ərəbistanının beynəlxalq təşkilatlar, xüsusilə İslam Əməkdaşlıq Təşkilatı çərçivəsində səmərəli əməkdaşlığını və qarşılıqlı dəstəyini də qeyd edib.Prezident iki ölkə xalqları arasında mövcud qardaşlıq münasibətlərinin və tərəfdaşlığın gələcək illərdə daha da inkişaf edəcəyinə əminliyini ifadə edib.İlham Əliyev Səudiyyə Ərəbistanı Kralına möhkəm cansağlığı, uzun ömür və dövlət fəaliyyətində uğurlar, ölkə xalqına isə əmin-amanlıq və firavanlıq arzulayıb.
