Elpress.az xəbər verir ki, Azərbaycan nümayəndə heyəti Türkiyənin COP31 sədrliyi çərçivəsində İstanbulda keçirilən İqlim Maliyyəsi Sammitində iştirak edib.
Azərbaycanı tədbirdə Prezidentin iqlim məsələləri üzrə nümayəndəsi Muxtar Babayev və xarici işlər nazirinin müavini Yalçın Rəfiyev təmsil ediblər.Sammitdə iqlim maliyyələşməsi, dayanıqlı şəhərlərin inkişafı, COP31-ə hazırlıq və iqlim dəyişikliklərinə qarşı mübarizə ilə bağlı məsələlər müzakirə olunub. Tədbirə dövlət qurumları, beynəlxalq maliyyə institutları, inkişaf bankları, investorlar və özəl sektorun nümayəndələri qatılıb.Yalçın Rəfiyev “İqlimə davamlı şəhərlərin iqlim maliyyəsi” mövzusunda dəyirmi masa müzakirəsində moderator kimi çıxış edib. O, COP29 çərçivəsində Bakı Maliyyə Hədəfi üzrə əldə olunan razılaşmanın əhəmiyyətini vurğulayıb.Nazir müavini həmçinin Bakı Davamlılıq Koalisiyası və dayanıqlı şəhərlərlə bağlı təşəbbüslərdən danışıb, qarşıdakı Bakı İqlim Fəaliyyəti Həftəsinin bu istiqamətdə mühüm rol oynayacağını bildirib.Muxtar Babayev və Yalçın Rəfiyev COP31 sədrliyi çərçivəsində keçirilən yüksək səviyyəli sessiyada da çıxış edərək COP29-un iqlim maliyyələşməsi sahəsində əldə etdiyi nəticələri diqqətə çatdırıblar.
