İki ölkə vətəndaşlarının hüquqlarının qorunması və viza rejiminin sadələşdirilməsi müzakirə olunub
Elpress.az xəbər verir ki, Sentyabrın 2-də Aşqabad şəhərində Azərbaycan və Türkmənistan xarici işlər nazirlikləri arasında növbəti konsulluq məsləhətləşmələri keçirilib.Görüşdə Azərbaycan nümayəndə heyətinə Xarici İşlər Nazirliyinin Konsulluq idarəsinin rəisi Emil Səfərov, Türkmənistan nümayəndə heyətinə isə Konsulluq xidmətləri idarəsinin rəhbəri Dövlətirat Muratov rəhbərlik edib.Məsləhətləşmələrdə Türkmənistanın Daxili İşlər Nazirliyi, Miqrasiya xidməti və Baş Prokurorluğunun nümayəndələri, həmçinin Azərbaycanın Daxili İşlər Nazirliyinin rəsmisi və ölkəmizin Türkmənistandakı səfirliyinin əməkdaşları iştirak ediblər.Danışıqlar zamanı iki ölkə arasında konsulluq sahəsində əməkdaşlığın mövcud vəziyyəti və gələcək inkişaf istiqamətləri barədə fikir mübadiləsi aparılıb.Tərəflər Azərbaycan və Türkmənistan vətəndaşlarının hüquq və maraqlarının qorunması məsələlərini nəzərdən keçirib, tətbiq olunan viza rejimlərinin sadələşdirilməsi imkanlarını müzakirə ediblər.Görüşdə həmçinin daxili işlər, vətəndaşlıq, miqrasiya, ədliyyə, təhsil və digər mühüm sahələrdə əməkdaşlıq məsələləri diqqət mərkəzində olub.Məsləhətləşmələrin yekununda nümayəndə heyətlərinin rəhbərləri görüşün protokolunu imzalayıblar. Növbəti konsulluq məsləhətləşmələrinin gələn il Bakıda keçirilməsi barədə razılıq əldə olunub.
