Vaqif Poeziya Günləri çərçivəsində Ağdamda Türk dünyasının gənc şairlər festivalı keçirilib
Elpress.az xəbər verir ki , Mədəniyyət Nazirliyi və Heydər Əliyev Fondunun birgə təşkilatçılığı ilə keçirilən Vaqif Poeziya Günləri çərçivəsində iyulun 17-də Ağdam Muğam Mərkəzində TÜRKSOY-un tərəfdaşlığı ilə “Sözün sabahı – Türk dünyasının gənc şairlər festivalı” təşkil olunub.Tədbirdə çıxış edən mədəniyyət nazirinin müavini Fərid Cəfərov Vaqif Poeziya Günlərinin Azərbaycan ədəbiyyatı və mədəniyyətinin ən mühüm ədəbi-mədəni layihələrindən biri olduğunu bildirib. O qeyd edib ki, işğaldan azad olunmuş ərazilərdə həyata keçirilən genişmiqyaslı bərpa və quruculuq işləri milli-mədəni irsin dirçəlişini bütün dünyaya nümayiş etdirir. F.Cəfərov əlavə edib ki, beş il əvvəl Şuşada bərpa olunan poeziya bayramı hər il daha da genişlənərək beynəlxalq əhəmiyyət qazanır.TÜRKSOY-un Baş katibi Sultan Raev isə çıxışında ortaq mədəniyyət və ədəbiyyatın türk xalqlarını birləşdirən ən güclü mənəvi körpülərdən biri olduğunu vurğulayıb. O, festivalın gələcəkdə Türk dünyasının müxtəlif şəhərlərində keçirilməsinin gözəl ənənəyə çevriləcəyinə ümid etdiyini bildirib.Azərbaycan Yazıçılar Birliyinin katibi Səlim Babullaoğlu, Ankara Sosial Elmlər Universitetinin rektoru Musa Kazım Arıcan və Türkiyə Yazıçılar Birliyinin sədri Muhammed Enes Kala çıxışlarında Qarabağda belə ədəbi-mədəni tədbirlərin keçirilməsinin xüsusi əhəmiyyət daşıdığını qeyd edərək, Şuşanın Türk dünyasının mühüm mədəniyyət mərkəzlərindən biri olduğunu vurğulayıblar.Tədbirin bədii hissəsində Türk dünyasının müxtəlif ölkələrindən gələn gənc şairlər öz şeirlərini səsləndirərək poeziya nümunələrini iştirakçılarla bölüşüblər.
