AMEA-nın Folklor İnstitutunda Azərbaycan Respublikası Prezidentinin 2026-cı ilin “Şəhərsalma və Memarlıq İli” elan edilməsi ilə bağlı Sərəncamının icrasına həsr olunan “Şəhər folkloru: sosial kimlik kontekstində kollektiv yaddaş” mövzusunda elmi sessiya keçirilib.
İnstitutdan bildirilib ki, tədbiri açan Folklor İnstitutunun direktoru, filologiya elmləri doktoru Hikmət Quliyev şəhərsalma və memarlıq məsələlərinin yalnız tikinti və urbanizasiya ilə məhdudlaşmadığını, kollektiv yaddaşın, mədəni kimliyin və sosial münasibətlərin formalaşmasına da təsir göstərdiyini vurğulayıb. O qeyd edib ki, Vətən müharibəsindən sonra həyata keçirilən yenidənqurma işləri və Böyük Qayıdış proqramı ölkənin strateji inkişaf prioritetləri sırasındadır.Daha sonra Hikmət Quliyev “Sosial-mədəni transformasiya və kommunikativ dinamika müstəvisində şəhər folkloru” mövzusunda məruzə ilə çıxış edib. Məruzədə şəhər folklorunun Azərbaycanda yetərincə araşdırılmadığı, bu istiqamətdə tədqiqatların genişləndirilməsinin vacibliyi diqqətə çatdırılıb.Sessiyada Folklor nəzəriyyəsi şöbəsinin müdiri professor Füzuli Bayat “Polisentrik kültür paradiqmasında şəhər folkloru” mövzusunda məruzə ilə çıxış edərək urbanizasiya proseslərinin və müxtəlif etnik-mədəni qrupların qarşılıqlı təsirinin şəhər folklorunun formalaşmasındakı rolunu təhlil edib.Folklor İnstitutunun elmi işlər üzrə direktor müavini dosent Afaq Xürrəmqızı isə “Hüseynqulu Sarabski və Bakı folkloru” mövzusunda təqdimatla çıxış edib. Məruzədə Bakı şəhər folklorunun formalaşması, onun uzun müddət tədqiqatlardan kənarda qalması və bu sahədə aparılan ilk sistemli araşdırmalar barədə məlumat verilib.Qeyd olunub ki, Hüseynqulu Sarabskinin “Köhnə Bakı” əsəri şəhər folklorunun öyrənilməsi baxımından mühüm mənbələrdən biridir. Əsərdə Novruz mərasimləri, xalq oyunları, toy adətləri, dini mərasimlər və məhəllə həyatı ilə bağlı zəngin folklor nümunələri əksini tapıb.
