Azərbaycanın zəngin sənətkarlıq irsi İstanbulda keçirilən beynəlxalq sərgidə nümayiş olunur. Ölkəmizi təmsil edən sənətkarlar milli əl sənəti nümunələrini xarici ziyarətçilərə təqdim edirlər.
Elpress.az xəbər verir ki, azərbaycanlı sənətkarlar “CraftIstanbul” 7-ci Beynəlxalq Əl Sənətləri və Dizayn Sərgisində iştirak edirlər. Təmsilçilik Azərbaycan Turizm Bürosunun Türkiyədəki nümayəndəliyi və Azərbaycanın İstanbulda Baş Konsulluğunun təşkilati dəstəyi ilə həyata keçirilib.
Sərgidə Mətanət Mirzəliyeva ənənəvi ipək kəlağayı nümunələrini, Səməni Qasımova isə Azərbaycan kilimlərini təqdim edir. Ziyarətçilərə bu sənət nümunələrinin hazırlanma xüsusiyyətləri və onların arxasında dayanan milli-mədəni irs barədə məlumat verilir.
Təqdim olunan əl işləri vasitəsilə kəlağayı və kilim sənətinin hazırlanma üsulları ilə yanaşı, bu sənətlərin formalaşmasında mühüm rol oynayan ənənələr də tanıdılır.
Qeyd edək ki, bu il “CraftIstanbul” sərgisində 220 sərgi iştirakçısı, 600-dən çox sənətkar və dizayner, eləcə də 50 beynəlxalq iştirakçı bir araya gəlib. Sərgi oktyabrın 4-dək davam edəcək.
Tədbir çərçivəsində 150-yə yaxın seminar və müxtəlif proqramların keçirilməsi nəzərdə tutulub. Sərgini 30 mindən çox ziyarətçinin ziyarət edəcəyi gözlənilir.
