Azərbaycan Dillər Universitetində (ADU) Azərbaycan-Kolumbiya təhsil əlaqələrinin inkişafı və ali təhsil müəssisələri arasında əməkdaşlıq perspektivləri müzakirə olunub.
İyunun 18-də Kolumbiyanın Azərbaycandakı səfiri Nelsi Rakel Munar Xaramiyo Azərbaycan Dillər Universitetində (ADU) görüş keçirib. Görüşdə Azərbaycan ilə Kolumbiya arasında dostluq münasibətlərinin inkişafı, xüsusilə təhsil, elm və mədəniyyət sahələrində əməkdaşlığın genişləndirilməsi məsələləri diqqət mərkəzində olub.ADU-nun rektoru akademik Kamal Abdulla iki ölkə arasındakı əlaqələrin inkişafından danışaraq universitetin beynəlxalq əməkdaşlıq imkanlarının daim genişləndirildiyini bildirib. O, Kolumbiyanın ali təhsil müəssisələri ilə birgə layihələrin həyata keçirilməsi və qarşılıqlı əlaqələrin qurulmasının mühüm əhəmiyyət daşıdığını qeyd edib.Görüş zamanı rektor səfiri universitetdə həyata keçirilən “Səfir saatı” layihəsində iştirak etməyə dəvət edib. Bildirilib ki, bu layihə tələbələrin müxtəlif ölkələrin diplomatik nümayəndələri ilə birbaşa əlaqə yaratmasına, beynəlxalq münasibətlər və dünya siyasəti barədə biliklərini artırmasına imkan yaradır.Kolumbiyanın Azərbaycandakı səfiri isə ADU-nun beynəlxalq fəaliyyətini yüksək qiymətləndirib və iki ölkə arasında təhsil, elm və mədəniyyət sahələrində əməkdaşlığın daha da inkişaf etdirilməsinin vacibliyini vurğulayıb. Səfir qeyd edib ki, həyata keçiriləcək birgə təşəbbüslər Azərbaycan-Kolumbiya münasibətlərinin daha da möhkəmlənməsinə xidmət edəcək.
