“TABIA Group” və Özbəkistanın “FlyKhiva” şirkəti arasında turizm və sağlamlıq sektorunda əməkdaşlığın inkişafına dair memorandum imzalanıb.
Azərbaycanın qonaqpərvərlik və sağlamlıq turizmi sahəsində fəaliyyət göstərən “TABIA Group” şirkəti ilə Özbəkistanın turizm və aviasiya şirkəti “FlyKhiva” arasında strateji əməkdaşlıq memorandumu imzalanıb. Saziş iki ölkə arasında turizm əlaqələrinin genişləndirilməsini, Naftalanın beynəlxalq səviyyədə tanıdılmasını və Azərbaycana gələn turistlərin sayının artırılmasını hədəfləyir.Bakıda keçirilən imzalanma mərasimində hər iki şirkətin rəhbər şəxsləri, Azərbaycan Turizm Bürosunun nümayəndələri və media təmsilçiləri iştirak ediblər. Tərəflər əməkdaşlıq çərçivəsində Özbəkistandan Azərbaycana turist səfərlərinin artırılması, xüsusilə Naftalanın sağlamlıq turizmi imkanlarının daha geniş auditoriyaya təqdim olunması istiqamətində razılığa gəliblər.Memorandum əsasında həyata keçirilən çarter uçuşları Özbəkistandan gələn turistlərin Naftalanın müalicəvi neftindən və sağlamlıq xidmətlərindən daha rahat şəkildə yararlanmasına imkan yaradacaq. İlk çarter reysinin uğurla həyata keçirilməsi bu istiqamətdə marağın yüksək olduğunu göstərib. Tərəflər gələcəkdə uçuşların sayının artırılması imkanlarını da nəzərdən keçirirlər.Bildirilib ki, bu əməkdaşlıq Azərbaycan və Özbəkistan arasında turizm əlaqələrinin inkişafına, həmçinin regionda iqtisadi və mədəni münasibətlərin daha da möhkəmlənməsinə töhfə verəcək. Naftalanın unikal müalicəvi nefti və sağlamlıq turizmi imkanları Azərbaycanın beynəlxalq turizm xəritəsində mövqeyinin güclənməsinə xidmət edir.“TABIA Group”un nümayəndələri qeyd ediblər ki, Naftalan Azərbaycanın ən mühüm sağlamlıq turizmi mərkəzlərindən biridir və yeni əməkdaşlıq bu istiqamətin xarici bazarlarda daha geniş tanıdılmasına imkan verəcək. “FlyKhiva” isə Azərbaycanla turizm əlaqələrinin inkişafında bu tərəfdaşlığın mühüm rol oynayacağını vurğulayıb.
