II Azərbaycan Beynəlxalq İnvestisiya Forumu başa çatıb
Elpress.az xəbər verir ki, Bakıda keçirilən II Azərbaycan Beynəlxalq İnvestisiya Forumu başa çatıb. Tədbir çərçivəsində beynəlxalq investorlar və tərəfdaş şirkətlərlə ümumi dəyəri 10,8 milyard ABŞ dolları olan investisiya layihələrini əhatə edən 23 sənəd imzalanıb.Forum müxtəlif ölkələrin dövlət nümayəndələrini, qlobal investorları, beynəlxalq maliyyə institutlarını, beyin mərkəzlərini və biznes liderlərini bir araya gətirib.“Parçalanmış dünyada etimadın bərpası: Cənubi Qafqaz qlobal bağlantı və investisiya sabitliyinin dayağı kimi” mövzusunda keçirilən tədbirdə qlobal iqtisadi proseslər, investisiya imkanları və regional əməkdaşlığın perspektivləri müzakirə olunub.Müzakirələr zamanı Azərbaycanın regional bağlantı imkanları, Orta Dəhlizin inkişafı, sənaye və azad iqtisadi zonalar, süni intellekt və rəqəmsal transformasiya, enerji və yaşıl keçid, kapital bazarları, aqrobiznes, kritik xammal və iqtisadi təhlükəsizlik kimi istiqamətlərə diqqət yetirilib.İmzalanan 23 sənəd süni intellekt, enerji, bərpa olunan enerji, tikinti, rəqəmsal iqtisadiyyat, sənaye, kənd təsərrüfatı, əczaçılıq, maliyyə və su təsərrüfatı daxil olmaqla müxtəlif sahələr üzrə layihələri əhatə edir.Bakı Enerji Həftəsi çərçivəsində iyun ayında elan olunan layihələr də nəzərə alındıqda, planlaşdırılan birgə investisiya layihələrinin ümumi dəyəri 16,7 milyard ABŞ dollarına çatır.Layihələrin həyata keçirilməsinin iqtisadiyyatın şaxələndirilməsinə, yeni texnologiya və innovasiyaların tətbiqinə, əlavə dəyərin yaradılmasına və məşğulluğun artırılmasına töhfə verməsi gözlənilir.
