İyunun 9-da Milli Məclisin İqtisadi siyasət, sənaye və sahibkarlıq komitəsinin iclasında “Azərbaycan Respublikasının 2025-ci il dövlət büdcəsinin icrası haqqında” qanun layihəsi müzakirəyə çıxarılıb.
Elpress.az “Qafqazinfo”ya istinadən xəbər verir ki, iclasda maliyyə naziri Sahil Babayev 2025-ci ilin dövlət büdcəsinin icrası ilə bağlı geniş təqdimatla çıxış edib.Bildirilib ki, ötən il dövlət maliyyəsinin səmərəli idarə olunması məqsədilə bir sıra islahatlar həyata keçirilib. Bu çərçivədə 13 altsistemdən ibarət “Rəqəmsal Dövlət Maliyyəsi” İnformasiya Sistemi yaradılıb və müvafiq Əsasnamə təsdiqlənib.Sistem çərçivəsində “e-müqavilə”, “e-rüsum”, “büdcə məlumat idarəetmə”, “elektron büdcə bələdçisi” və “dövlət müəssisələrinin rəqəmsal monitorinqi” kimi modullar istifadəyə verilib.Nazir qeyd edib ki, dövlət xəzinədarlığının fəaliyyəti təkmilləşdirilib, büdcə gəlir və xərclərinə nəzarət mexanizmləri gücləndirilib, həmçinin proqnozlaşdırma üçün yeni maliyyə hesabatlılıq portalı istifadəyə verilib.Məlumatda bildirilib ki, hesabat dövründə büdcə xərclərinin 98 faizi xəzinə nəzarətinə cəlb olunub, risk əsaslı nəzarət mexanizminin tətbiqinə başlanılıb və xəzinədarlıq orqanlarının idarəetməsi mərkəzləşdirilib.Eyni zamanda dövlət müəssisələrinin maliyyə hesabatlarının monitorinqi, dividend siyasəti və investisiya layihələrinin maliyyə ekspertizası istiqamətində yeni qaydaların tətbiqinə başlanıldığı qeyd olunub.
