Qeyri-neft-qaz məhsullarının ixracını həyata keçirən mikro, kiçik və orta sahibkarlıq subyektlərinə gömrük rəsmiləşdirilməsi xərclərinin bir hissəsinin dövlət tərəfindən kompensasiya olunmasına başlanılacaq.
Elpress.az xəbər verir ki, bunu deputat Vüqar Bayramov bildirib.Onun sözlərinə görə, Prezident İlham Əliyevin imzaladığı “Qeyri-neft-qaz malları üzrə ixracın dəstəklənməsi ilə bağlı əlavə tədbirlər haqqında” Fərmana əsasən, kompensasiyalar gələn aydan tətbiq ediləcək.
Deputat qeyd edib ki, kompensasiyalardan Azərbaycan mənşəli qeyri-neft-qaz məhsullarını ixrac edən mikro, kiçik və orta sahibkarlar faydalana biləcəklər. Dəstək gömrük rəsmiləşdirilməsi xərclərinin bir hissəsini əhatə edəcək.
Bildirilib ki, kompensasiyaların məbləği gömrük dəyəri üzrə tətbiq edilən yığım hədlərinə uyğun hesablanacaq. Dəstək 2026-cı il sentyabrın 1-dən 2031-ci il sentyabrın 30-dək həyata keçiriləcək ixrac əməliyyatlarına şamil olunacaq.
Vüqar Bayramov vurğulayıb ki, yeni mexanizm ixracatçı sahibkarların dövlət tərəfindən daha yaxından dəstəklənməsinə, qeyri-neft-qaz ixracının genişlənməsinə və yeni bazarlara çıxış imkanlarının artırılmasına xidmət edəcək.
