Bu gün “Bakcell” şirkəti baş icraçı direktor vəzifəsinə yeni təyinatla bağlı rəsmi açıqlama yayaraq rəhbərlik strukturunda baş verən dəyişiklik barədə ictimaiyyəti məlumatlandırıb.
Telekommunikasiya sahəsində 35 ildən artıq beynəlxalq təcrübəyə malik olan Qunnar Panke “Bakcell” şirkətinin baş icraçı direktoru vəzifəsinə təyin olunub. O, müştəriyönümlü biznes transformasiyası, strateji inkişaf və dayanıqlı artım sahələrində qazandığı geniş beynəlxalq təcrübə ilə tanınır və bu müddət ərzində Azərbaycan, Almaniya, Fransa, Rumıniya və bir sıra digər ölkələrin aparıcı telekommunikasiya şirkətlərində müxtəlif rəhbər vəzifələrdə uğurla fəaliyyət göstərib. Qunnar Panke akademik baxımdan da yüksək hazırlığa malikdir; o, Fransanın Poitiers Universitetində strateji idarəetmə üzrə fəlsəfə doktoru (PhD) dərəcəsi alıb, ENSPTT Universitetində MBA təhsili alaraq idarəetmə sahəsində biliklərini daha da dərinləşdirib, eyni zamanda INSEAD, Oksford Universiteti, London Biznes Məktəbi, IE (Madrid), ESMT (Almaniya) və Darden Biznes Məktəbi (ABŞ) kimi dünyanın nüfuzlu ali təhsil müəssisələrində müxtəlif rəhbərlik və inkişaf proqramlarını uğurla tamamlayıb. O, təyinatla bağlı açıqlamasında Bakcell-ə qoşulmasını böyük məsuliyyət və şərəf kimi qiymətləndirərək innovasiya, süni intellekt və müştəriyönümlü həllər vasitəsilə abunəçilər üçün əlavə dəyər yaratmağı, şirkətin telekommunikasiya sektorundakı mövqeyini daha da gücləndirməyi və Azərbaycanın rəqəmsal inkişafında daha fəal strateji rol oynamağı hədəflədiyini bildirib. Yeni təyinatın Bakcell-in müştəriyönümlü innovasiya, süni intellekt və rəqəmsal xidmətlər üzrə uzunmüddətli strateji prioritetlərini daha da sürətləndirəcəyi, həmçinin müştəri təcrübəsinin təkmilləşdirilməsi və AI əsaslı həllərin genişləndirilməsi istiqamətində şirkətin fəaliyyətinə mühüm təkan verəcəyi qeyd olunur. Bakcell isə Azərbaycanın ilk və ən böyük özəl telekommunikasiya şirkəti olaraq hazırda üç milyondan çox müştəriyə yüksəkkeyfiyyətli xidmət göstərir və NEQSOL Holding tərkibində fəaliyyət göstərən Azerconnect Group-a daxildir.
