Azərbaycan Hava Yolları (AZAL) Naxçıvan istiqamətində həyata keçirilən aviareyslərlə bağlı növbəti məhdudiyyət qərarı qəbul edib. Naxçıvan Beynəlxalq Aeroportu ətrafında müşahidə olunan əlverişsiz hava şəraiti səbəbindən Bakı–Naxçıvan–Bakı marşrutu üzrə uçuşlar yenidən təxirə salınıb.
Elpress.az-ın AZAL-a istinadən verdiyi məlumata əsasən, qərar sərnişinlərin təhlükəsizliyinin tam təmin olunması məqsədilə qəbul edilib. Güclü külək, məhdud görünüş və hava şəraitinin dəyişkən olması səbəbindən reyslərin vaxtında həyata keçirilməsi mümkün olmayıb. AZAL qeyd edib ki, uçuş təhlükəsizliyi bütün hallarda prioritet olaraq qalır və risk yarada biləcək hava şəraitində reyslərin icrasına icazə verilmir.
Aviaşirkət tərəfindən sərnişinlərin məlumatlandırılması və yaranmış vəziyyətlə bağlı zəruri tədbirlərin görüldüyü bildirilib. Təxirə salınan reyslərin sərnişinlərinə uçuşların yeni vaxtı barədə əlavə məlumat veriləcəyi qeyd olunub.
AZAL nümayəndələri vurğulayıblar ki, hava şəraiti normallaşdıqdan və uçuşlar üçün təhlükəsiz şərait yarandıqdan sonra Bakı–Naxçıvan–Bakı istiqamətində reyslərin əvvəlki qrafik üzrə bərpası təmin ediləcək. Aviaşirkət sərnişinlərə uçuş statusunu rəsmi kanallar vasitəsilə mütəmadi izləməyi tövsiyə edib.
