Bakıda keçirilən Ümumdünya Şəhərsalma Forumunun 13-cü Sessiyası (WUF13) çərçivəsində təşkil olunan “Mənzil maliyyələşdirilməsi üzrə yeni razılaşma” adlı tədbirdə Azərbaycanın mənzil siyasəti və maliyyələşdirmə modeli geniş müzakirə olunub. Tədbirdə çıxış edən maliyyə nazirinin birinci müavini Anar Kərimov bildirib ki, ölkədə tətbiq olunan mənzil maliyyələşdirilməsi sistemi sosial inklüzivlik və maliyyə dayanıqlılığı prinsiplərinin uzlaşdırılması əsasında formalaşdırılıb. Onun sözlərinə görə, model dövlət dəstəyi ilə bazar mexanizmlərinin balanslı şəkildə birləşdirilməsini nəzərdə tutur.
Nazir müavini vurğulayıb ki, müasir dövrdə mənzil siyasəti artıq yalnız tikinti sektoru və sosial təminat məsələsi kimi qiymətləndirilmir. Bu sahə insan kapitalının inkişafı, sosial rifahın gücləndirilməsi və dayanıqlı iqtisadi artımın təmin olunması baxımından strateji istiqamət hesab edilir. Azərbaycanda həyata keçirilən siyasətin əsas məqsədi isə əhalinin müxtəlif sosial qrupları üçün mənzilə çıxış imkanlarını genişləndirməkdir.
Elpress.az-ın məlumatına əsasən, çıxış zamanı mənzil maliyyələşdirilməsi sistemində aparılan rəqəmsal transformasiya proseslərinə də diqqət çəkilib. Bildirilib ki, müraciətlərin qəbulu, qiymətləndirilməsi və təsdiqi mərhələləri artıq elektron platformalar vasitəsilə tam rəqəmsal formada həyata keçirilir. Bu yanaşmanın proseslərin daha operativ, şəffaf və əlçatan şəkildə təşkilinə imkan yaratdığı qeyd olunub.
Anar Kərimov əlavə edib ki, ölkədə mənzilə olan yüksək tələbat mövcud təklif imkanlarını üstələyir. Bu səbəbdən sosial yönümlü və ədalətli bölgü sisteminin yaradılması üçün yeni rəqəmsal həllər üzərində iş aparılır. O, həmçinin işğaldan azad edilmiş ərazilərdə genişmiqyaslı yenidənqurma və yaşayış infrastrukturunun qurulması işlərinin davam etdiyini, sakinlərin mərhələli şəkildə həmin bölgələrə köçürüldüyünü diqqətə çatdırıb.
Sessiyanın ilk hissəsində mənzil təminatının makroiqtisadi baxımdan əhəmiyyəti ön plana çıxarılıb. Beynəlxalq maliyyə institutlarının nümayəndələri çıxışlarında xüsusilə aşağı və orta gəlirli ölkələrdə mənzil maliyyələşdirilməsi sahəsində mövcud çətinliklərə toxunublar. Ekspertlər bildiriblər ki, ənənəvi maliyyələşdirmə mexanizmləri bir çox hallarda vətəndaşların əlçatan mənzil imkanlarını genişləndirmək üçün kifayət etmir və daha çevik yanaşmalar tələb olunur.
Panel müzakirələri zamanı şəhər rəhbərləri, inkişaf banklarının təmsilçiləri və müxtəlif sahələr üzrə mütəxəssislər fiskal siyasət, torpaq idarəçiliyi və maliyyə tənzimləmələrinin daha səmərəli əlaqələndirilməsi məsələlərini müzakirə ediblər. Eyni zamanda dövlət-özəl tərəfdaşlığı, kirayə mənzil fondlarının genişləndirilməsi, torpaq əsaslı maliyyələşdirmə və icma maliyyə alətlərinin tətbiqi kimi mövzular da diqqət mərkəzində olub.
Forumun yekununda iştirakçılar mənzil maliyyələşdirilməsinin dayanıqlı inkişaf strategiyalarının əsas istiqamətlərindən biri olduğunu vurğulayıblar. Müzakirələrdə ölkələr arasında təcrübə mübadiləsinin vacibliyi qeyd olunub və gələcəkdə daha inklüziv, şəffaf və davamlı mənzil siyasətlərinin tətbiqinin zəruriliyi ön plana çəkilib.
