Kənd təsərrüfatı naziri Məcnun Məmmədov ölkəmizdə səfərdə olan “John Deere” şirkətinin MDB və Mərkəzi Asiya ölkələri üzrə prezidenti, “John Deere Walldorf International” MMC-nin Baş icraçı direktoru Çaba Leyko və şirkətin MDB üzrə vitse-prezidenti Peter Zaksen ilə görüş keçirib.
Elpress.az xəbər verir ki, görüşdə Azərbaycan ilə “John Deere” arasında mövcud əməkdaşlığın vəziyyəti və gələcək inkişaf perspektivləri müzakirə olunub.
Nazir Məcnun Məmmədov bildirib ki, Prezident İlham Əliyevin rəhbərliyi ilə aqrar sahənin inkişafı, müasir texnologiyaların tətbiqi, rəqabətqabiliyyətli istehsalın artırılması və ərzaq təhlükəsizliyinin gücləndirilməsi istiqamətində ardıcıl islahatlar həyata keçirilir.
“John Deere” şirkətinin nümayəndəsi Çaba Leyko isə Azərbaycanın şirkət üçün mühüm tərəfdaş olduğunu vurğulayaraq, ölkədə fəaliyyətin genişləndirilməsində və yeni layihələrin icrasında maraqlı olduqlarını bildirib.
Görüş zamanı pambıqçılıq və taxılçılıqda innovativ texnologiyaların tətbiqi, kənd təsərrüfatı texnikasının yenilənməsi, logistikanın inkişafı, aqrar sahə üzrə peşəkar kadr hazırlığı və digər əməkdaşlıq istiqamətləri ətrafında fikir mübadiləsi aparılıb.
