Elpress.az APA-ya istinadən xəbər verir ki, Naxçıvan Muxtar Respublikasında sosial-iqtisadi inkişafın daha da sürətləndirilməsi məqsədilə ümumilikdə 258 milyon manat vəsait ayrılacaq.
Sərəncama əsasən, vəsait dövlət və Naxçıvan Muxtar Respublikasının büdcələri hesabına müxtəlif infrastruktur və sosial layihələrin həyata keçirilməsinə yönəldiləcək.
Maliyyələşdiriləcək əsas istiqamətlər arasında Tivi Su Elektrik Stansiyasında tikinti işlərinin davam etdirilməsi, avtomobil yollarının əsaslı təmiri, Naxçıvan Dövlət Universitetində tələbələr üçün yeni yataqxananın tikintisi, yaşayış binalarının təmiri və yeni məktəbəqədər təhsil müəssisələrinin yaradılması yer alır.
Bundan başqa, şəhərlərarası ictimai nəqliyyat parkının yenilənməsi və yaşayış binalarına xidmət göstərən istilik qazanxanalarının əsaslı təmiri üçün də vəsait ayrılacaq.Sərəncam çərçivəsində Tivi Su Elektrik Stansiyasına 66 milyon, avtomobil yollarının əsaslı təmirinə 70 milyon, Naxçıvan Dövlət Universitetinin 1000 yerlik yataqxanasına 25 milyon, yeni məktəbəqədər təhsil müəssisələrinin tikintisinə 20 milyon manat yönəldiləcək.İctimai nəqliyyat parkının yenilənməsi üçün 53 milyon, yaşayış binalarının əsaslı təmirinə 15 milyon, istilik qazanxanalarının təmirinə isə 9 milyon manat ayrılması nəzərdə tutulur.
Qeyd edək ki, Sərəncam Naxçıvanda enerji, nəqliyyat, təhsil, kommunal xidmətlər və yaşayış infrastrukturunun inkişafına yönəlmiş bir sıra layihələri əhatə edir
