Daxili İşlər Nazirliyinin Kibercinayətkarlıqla Mübarizə Baş İdarəsi (KMBİ) qadınları sosial şəbəkələrdə süni intellekt vasitəsilə şantaj edən şəxsləri saxlayıb.
Elpress.az xəbər verir ki, polisə naməlum şəxslərin qadınların sosial şəbəkələrdə paylaşdıqları fotoları süni intellekt proqramları vasitəsilə montaj edərək üzərinə nalayiq ifadələr yazması, həmin görüntüləri müxtəlif platformalarda yayması və silinməsi müqabilində pul tələb etməsi barədə müraciətlər daxil olub.
Həyata keçirilən əməliyyat-texniki tədbirlər nəticəsində bu əməlləri törətməkdə şübhəli bilinən 31 yaşlı Loğman Cəbizadə və 20 yaşlı Elvin Məmmədov saxlanılıb.
Araşdırmalar zamanı müəyyən edilib ki, onlar “TikTok”, “Instagram” və “Telegram” sosial şəbəkələrindən qadınlara məxsus fotoları götürərək süni intellekt proqramları vasitəsilə saxtalaşdırıblar. Daha sonra görüntülərin üzərinə təhqiramiz məzmun əlavə edib, saxta hesablar vasitəsilə yayımlayaraq zərərçəkənlərdən müxtəlif məbləğlərdə pul tələb ediblər.
Faktlarla bağlı Baş İdarədə cinayət işi başlanılıb, hər iki şəxs cinayət məsuliyyətinə cəlb olunub.
Daxili İşlər Nazirliyi vətəndaşlara sosial şəbəkələrdə şəxsi foto və videolarını tanımadıqları şəxslərlə paylaşmamağı, şübhəli mesaj və təkliflərə etibar etməməyi tövsiyə edib.
