Qara dənizdə, Rumıniya sahilləri yaxınlığında yük gəmisinə edilən dron hücumu azərbaycanlı dənizçinin ölümü ilə nəticələnib.
Elpress.az xəbər verir ki, Türkiyə bayrağı altında üzən “Royad Məmmədov” adlı gəmi hücuma məruz qalıb. Hadisə zamanı gəminin kapitanı, 1974-cü il təvəllüdlü Azərbaycan vətəndaşı Rüstəm Həsənov həyatını itirib.
Hücumdan sonra 2002-ci il təvəllüdlü Məhəmməd Süleymanzadə ilə əlaqə kəsilib. Onun tapılması istiqamətində axtarış tədbirləri davam etdirilir.
Gəmidəki digər azərbaycanlı ekipaj üzvləri xilas olunub. Onlardan üç nəfər tibbi yardım üçün xəstəxanaya yerləşdirilib.
Qeyd edək ki, “Royad Məmmədov” gəmisinin ISM meneceri kimi “Palmal Gemicilik ve Acentelik” şirkəti göstərilir. Şirkətlər qrupunun təsisçisi azərbaycanlı iş adamı Mübariz Mənsimovdur.
Azərbaycan Xarici İşlər Nazirliyi hadisə ilə bağlı aidiyyəti qurumlarla koordinasiya işlərini davam etdirir.
