Korrupsiya hallarının aşkarlanmasına kömək edən şəxslərin maddi həvəsləndirilməsi ilə bağlı yeni mexanizmin yaradılması təklif olunur. Belə şəxslərə müəyyən edilmiş qaydalar çərçivəsində mükafat veriləcək və həmin vəsait gəlir vergisinə cəlb olunmayacaq.
Elpress.az xəbər verir ki, bu müddəalar Milli Məclisdə müzakirəyə çıxarılan “Korrupsiya ilə əlaqədar hüquqpozmalarla bağlı məlumat verən şəxslərin həvəsləndirilməsi və müdafiəsi haqqında” yeni qanun layihəsində əksini tapıb.
Layihəyə əsasən, təqdim edilən məlumat təsdiqləndiyi halda məlumat verən şəxsə təşkilatın vəsaiti hesabına 10 iş günü ərzində mükafat ödənilməsi nəzərdə tutulur. Büdcə təşkilatlarında isə ödəniş həmin qurumların saxlanılması xərcləri və büdcədənkənar vəsaitlər hesabına həyata keçiriləcək.
Mükafatın məbləği minimum əməkhaqqının 25 misli həddini keçə bilməz. Ödəniş müəyyən edilərkən hüquqpozmanın xarakteri, aşkar edilən faktların sayı, məlumatın əhəmiyyəti, vurulmuş zərərin və dövlətə qaytarılmış aktivlərin həcmi nəzərə alınacaq.
Qanun layihəsində daha bir maliyyə mexanizmi də nəzərdə tutulur. Cinayət işi üzrə xüsusi müsadirə tətbiq edildiyi və yekun qərarın qanunvericilikdə müəyyən edilmiş qaydada çıxarıldığı hallarda, müsadirə olunmuş əmlak və ya vəsait hesabına dövlətə ödənilən məbləğin, yaxud təmin edilmiş maddi ziyanın 5 faizi məlumatı təqdim edən şəxsə veriləcək.
