Bu ilin yanvar-aprel aylarında Azərbaycanda pərakəndə satış və ictimai iaşə sahəsində fəaliyyət göstərən obyektlərdən alınan mallara görə vətəndaşlara milyonlarla manat ƏDV geri ödənilib. Qaytarılan məbləğ neft-qaz məhsulları, avtomobil, alkoqollu içki və tütün məmulatlarını əhatə etməyib.
Elpress.az-ın xəbərinə görə, məlumatı İqtisadiyyat Nazirliyi yanında Dövlət Vergi Xidməti yayıb.
Bildirilib ki, teatr və kino xidmətləri, muzey ziyarətləri, simfonik orkestr konsertləri, eləcə də tibb müəssisələri və özəl tibbi fəaliyyət göstərən şəxslərin xidmətləri üzrə ödənilən ƏDV-nin də bir hissəsi vətəndaşlara geri qaytarılıb.
Həmçinin işğaldan azad olunmuş ərazilərdə fəaliyyət göstərən hotellərdə gecələmə və qalma xidmətlərinə görə ödənilən ƏDV də geri ödəniş mexanizminə daxil edilib.
Ümumilikdə, hesabat dövründə fiziki şəxslərə qaytarılan ƏDV məbləği 70 milyon 452,1 min manat olub.
Bundan əlavə, xarici vətəndaşların Azərbaycanda şəxsi istifadə məqsədilə aldıqları mallara görə tətbiq edilən “tax free” sistemi çərçivəsində dövlət büdcəsindən 2 milyon 758,4 min manat ƏDV geri qaytarılıb.
