Tərəflər sənədin mümkün qədər tez imzalanması barədə razılığa gəliblər
Elpress.az xəbər verir ki, Avropa İttifaqı və Avstraliya azad ticarət sazişi üzrə danışıqları yekunlaşdırıb.Tərəflər sazişin mümkün qədər qısa müddətdə imzalanması ilə bağlı razılığa gəliblər. Bu barədə Aİ və Avstraliya liderlərinin BMT Baş Assambleyası çərçivəsində keçirilən görüşdən sonra yayılan birgə bəyanatında bildirilib.Görüş zamanı Avstraliyanın 2027-ci ildən Aİ-nin “Horizon Europe” proqramına qoşulması istiqamətində əldə olunan irəliləyiş də müzakirə edilib. Bundan əlavə, Aİ-Avstraliya Təhlükəsizlik və Müdafiə Tərəfdaşlığının həyata keçirilməsi və kritik xammal sahəsində əməkdaşlıq məsələlərinə toxunulub.Tərəflər Ukraynaya dəstək, Yaxın Şərq və İran ətrafındakı vəziyyət, həmçinin Çin və Sakit okean regionundakı proseslərlə bağlı fikir mübadiləsi aparıblar.Liderlər BMT Nizamnaməsinə və beynəlxalq hüquqa sadiqliyi, sülh, təhlükəsizlik və dayanıqlı inkişafın təşviqinin vacibliyini vurğulayıblar.Həmçinin iqtisadi təhlükəsizliyin gücləndirilməsi, iqtisadi təzyiqlərə qarşı mübarizə, kritik və yeni texnologiyalar, eləcə də süni intellektin idarə olunması sahələrində əməkdaşlığın genişləndirilməsi barədə razılıq əldə olunub.
