Asiya İnkişaf Bankı (Asian Development Bank) Azərbaycanın da iştirak etdiyi “Ticarətə Dəstək və İnklüziv Yaşıl Artım 2026–2028” adlı regional texniki yardım layihəsi üçün ümumilikdə 259,4 min ABŞ dolları məbləğində qrant ayrıldığını bildirib.
Elpress.az-ın APA-ya istinadən verdiyi məlumata əsasən, maliyyələşmənin 112,5 min ABŞ dolları Asiya İnkişaf Bankının Texniki Yardım Xüsusi Fondu tərəfindən, 146,9 min ABŞ dolları isə Avstraliya hökuməti tərəfindən təmin edilir.
Layihə Azərbaycan da daxil olmaqla Asiya və Sakit Okean regionu ölkələrində ticarət siyasətinin təkmilləşdirilməsinə, rəqəmsal ticarətin inkişafına, yaşıl iqtisadi artımın təşviqinə və regional iqtisadi inteqrasiyanın gücləndirilməsinə yönəlib.
Təşəbbüs çərçivəsində analitik hesabatların hazırlanması, regional seminarların təşkili və iştirakçı ölkələrin dövlət qurumlarının institusional imkanlarının artırılması üzrə tədbirlərin həyata keçirilməsi nəzərdə tutulur.
Asian Development Bank bildirir ki, layihə inkişaf etməkdə olan üzv ölkələrin qlobal və regional dəyər zəncirlərinə daha sıx inteqrasiyasını təmin etməyə, ticarət xərclərini azaltmağa və inklüziv iqtisadi artımı dəstəkləməyə xidmət edəcək.
Qeyd olunur ki, layihədə Azərbaycanla yanaşı Ermənistan, Gürcüstan, Qazaxıstan, Qırğızıstan, Özbəkistan və digər Asian Development Bank üzv ölkələri də iştirak edir.
