Neftçi Misli Premyer Liqasında mövsümün son – XXXIII turunda meydana çıxıb.
Elpress.az-ın Qafqazinfo-a istinadən yaydığı məlumata görə, UEFA Konfrans Liqasına vəsiqəni əvvəlcədən təmin edən “ağ-qaralar” səfərdə Kəpəz ilə üz-üzə gəlib.Mehdi Hüseynzadə adına Sumqayıt şəhər stadionunda keçirilən görüş Bakı klubunun 1:0 hesablı qələbəsi ilə yekunlaşıb.İlk yarıda hesab açılmayıb. Fasilədən sonra daha üstün oyun nümayiş etdirən qonaqlar 54-cü dəqiqədə Freddi Varqasın qolu ilə önə keçiblər. Qarşılaşmanın 65-ci dəqiqəsində isə paytaxt təmsilçisi azlıqda qalıb. Belə ki, yarımmüdafiəçi İfeanyi Metyu birbaşa qırmızı vərəqə alaraq meydandan kənarlaşdırılıb. Buna baxmayaraq, Yuri Vernidubun komandası üstün hesabı sona qədər qoruyub.Bu nəticədən sonra xalını 59-a yüksəldən Neftçi 2025/2026 mövsümünü 4-cü pillədə tamamlayıb. Kəpəz isə 27 xalla sonuncu – 10-cu yerdə qərarlaşıb.
