Azərbaycanda keçiriləcək 15 yaşınadək oğlanlar arasında ilk dünya çempionatı və festivalı ilə əlaqədar ölkəyə gələcək əcnəbilər və vətəndaşlığı olmayan şəxslər üçün viza proseduru sadələşdirilib.
Elpress.az xəbər verir ki, Prezident İlham Əliyev bununla bağlı “15 yaşınadək oğlanlar arasında futbol üzrə ilk dünya çempionatı və festivalının keçirilməsi ilə əlaqədar Azərbaycan Respublikasına gələcək əcnəbilər və vətəndaşlığı olmayan şəxslər üçün viza prosedurlarının sadələşdirilməsi haqqında” Sərəncam imzalayıb.Sərəncama əsasən, FIFA U-15 World Cup and Festival tədbiri ilə bağlı Azərbaycana səfər edən əcnəbilər və vətəndaşlığı olmayan şəxslər 22 sentyabr–5 noyabr 2026-cı il tarixlərində ölkənin beynəlxalq hava limanlarında viza əldə edə biləcəklər.Bunun üçün həmin şəxslər müəyyən edilmiş sənədlərdən ən azı birini təqdim etməlidirlər.Viza verilməsi üçün əsas kimi Azərbaycan Futbol Federasiyaları Assosiasiyasının (AFFA) rəsmi dəvət məktubu, həmçinin FIFA-nın müvafiq qaydalarına uyğun elektron qeydiyyat sistemi vasitəsilə akkreditasiyadan keçildiyini təsdiqləyən sənəd qəbul ediləcək.Sərəncamın icrası ilə əlaqədar Xarici İşlər Nazirliyinə də müvafiq tapşırıq verilib. Nazirlik viza prosedurunun sadələşdirilməsi barədə FIFA, Beynəlxalq Hava Nəqliyyatı Assosiasiyası və xarici dövlətlərin aidiyyəti qurumlarını məlumatlandırmalıdır.
Qeyd edək ki, sözügedən tədbir Azərbaycanda 15 yaşınadək oğlanlar arasında futbol üzrə ilk dünya çempionatı və festivalı kimi keçiriləcək.
