İstanbulda təşkil olunan VIII Etnoidman Beynəlxalq Mədəniyyət Festivalı yekunlaşıb.Festival türk dünyasının ortaq irsinin, milli-mədəni dəyərlərin və ənənəvi idman növlərinin beynəlxalq səviyyədə tanıdılmasına həsr olunub.
Elpress.az Azərtac – a istinadən xəbər verir ki, bu il “Dünya burada” devizi ilə keçirilən festivalda ənənəvi idman növləri, atüstü oyunlar, oxatma, güləş yarışları, səhnə proqramları, həmçinin əl işləri və etnik musiqi təqdim olunub.Festivalda Azərbaycanın Türkiyədəki səfirliyinin nəzdində fəaliyyət göstərən Azərbaycan Mədəniyyət Mərkəzi “Zəngəzur” Xalq Rəqsləri Ansamblı ilə təmsil olunub.Tədbir çərçivəsində “Natiq” ritm qrupu və türkdilli xalqların nümayəndələrinin yer aldığı “Rüzgar” qrupunun çıxışları da nümayiş etdirilib.Festivalda Yaponiya, Qazaxıstan, Litva, Rusiya və Qırğızıstan daxil olmaqla müxtəlif ölkələrin milli oyunları, ənənəvi idman növləri və mədəni təqdimatları yer alıb.İdman bölməsində ziyarətçilər Azərbaycanın milli idman növü olan zorxana ilə yaxından tanış olmaq imkanı qazanıblar.Bununla yanaşı, iştirakçılar oxatma və atçılıq kimi ənənəvi idman növlərini sınaqdan keçirib, emalatxanalarda isə mədəni irsin bir hissəsi olan sənət nümunələri ilə tanış olublar. Təqdim olunan milli oyunlar, səhnə çıxışları, əl işləri və qastronomiya nümunələri ziyarətçilərə fərqli təcrübə yaşadıb.Eyni zamanda, festival ərazisində yaradılan emalatxanalarda qonaqlara ənənəvi sənətlər üzrə praktiki biliklər əldə etmək imkanı verilib.Qeyd edək ki, mayın 21-dən 24-dək davam edən festivalın keçirildiyi Atatürk Hava Limanının ərazisi ziyarətçilər üçün canlı mədəniyyət məkanına çevrilib.
