Anqolada şimal-qərb bölgəsindəki qeyri-qanuni qızıl şaxtasında baş verən torpaq sürüşməsi nəticəsində azı 28 nəfər həlak olub.
Bu barədə Anqola İnformasiya Agentliyi Benqo vilayətinin yerli hakimiyyət orqanlarına istinadən məlumat yayıb.Məlumata əsasən, hadisə zamanı dörd nəfər xilas edilib. Benqo polisinin nümayəndəsi Qaşpar Luis İnasio bildirib ki, ölənlərin hamısı 18-40 yaş aralığında olan kişilərdir.Şahidlərin sözlərinə görə, faciə təpədən qopan iri torpaq qatının şaxtanın üzərinə çökməsi nəticəsində baş verib. Bu səbəbdən yerin dərinliyində çalışan şəxslər dağıntı altında qalıblar.Hazırda ərazidə axtarış-xilasetmə işləri davam etdirilir. Rəsmi məlumatda iki nəfərin itkin düşdüyü qeyd olunsa da, yerli sakinlər şaxtada daha 70 nəfərin qala biləcəyini bildirirlər.İlkin versiyaya görə, torpaq sürüşməsinə son üç gündə bölgədə müşahidə olunan güclü yağışlar səbəb olub.
