Elşən
15 İyun 2026 · 23:33
1266 baxış
Üzünü o yana çevir,
Bu üzdə qış havası var.
Qəribliyin qucağında,
Doğmalığın davası var.
Gör, fikrim hara çəkdi,
Dili söz-söz dara çəkdi.
Kim deyir ki, Allah təkdir?
Onun da öz Həvvası var.
Ölmək hələ son deyildi,
Olmaq ölüb don geyindi.
Hava, torpaq, su göyündü,
Göyün də öz yuvası var.
Mələk mənəm, Tanrı mənəm,
Eşq bildiyin yarın mənəm.
Dörd sözündən biri mənəm,
Dörd nəfərdən üç asi var.
Qələm mənəm, sözdə mənəm,
Ocağında közdə mənəm.
Arxada sirr, üzdə mənəm,
Ruhun bədən libası var.
