AZAL hava şəraiti ilə əlaqədar Bakı–Naxçıvan uçuşlarını ləğv edib
Azərbaycan Hava Yolları (AZAL) iyunun 27-nə planlaşdırılan Bakı–Naxçıvan istiqamətindəki bütün reyslərin ləğv edildiyini açıqlayıb. Qərara Naxçıvan Beynəlxalq Hava Limanı ərazisində müşahidə olunan ildırımlı və qeyri-sabit hava şəraiti səbəb olub.Aviaşirkətdən bildirilib ki, sərnişinlərə uçuş cədvəlində baş verən dəyişikliklərlə bağlı ətraflı məlumat təqdim olunacaq. Hava şəraiti normallaşdıqdan sonra Bakı–Naxçıvan reyslərinin adi qaydada bərpa edilməsi planlaşdırılır.AZAL qeyd edib ki, qəbul edilən qərarlar ilk növbədə sərnişinlərin və ekipaj üzvlərinin təhlükəsizliyinin təmin olunmasına yönəlib. Aviaşirkət bütün addımlarını beynəlxalq aviasiya təhlükəsizliyi standartlarına uyğun şəkildə həyata keçirir.
