Hacıqabul rayonunda açıq ərazidə baş vermiş yanğın hadisəsinin qısa müddətdə lokallaşdırılması və alovun daha geniş sahələrə yayılmasının qarşısının alınması məqsədilə ətraf rayonlardan əlavə yanğınsöndürmə texnikaları və canlı qüvvə cəlb olunub.
Elpress.az-ın Azərtac.az-a istinadən verdiyi məlumata əsasən, Hadisə günorta saatlarında Hacıqabul rayonunun Ağacanlı kəndi ərazisində yerləşən açıq sahədə qeydə alınıb. İlkin məlumata görə, kol-kos örtüyünün sıx olduğu ərazidə və istifadəyə yararsız avtomobil şinlərinin toplandığı sahədə başlayan yanğın qısa müddət ərzində genişlənərək ətraf ərazilərə yayılıb. Güclü alov nəticəsində təxminən 6 hektara yaxın ərazi yanaraq zərər görüb. Yanğının təsirindən yüksəkgərginlikli elektrik naqillərindən biri qırılıb ki, bu da vəziyyətin daha da mürəkkəbləşməsinə səbəb olub.Yanğının geniş əraziyə yayılmasının qarşısını almaq və alovu nəzarət altına almaq məqsədilə hadisə yerinə Fövqəladə Hallar Nazirliyinin Dövlət Yanğından Mühafizə Xidmətinin Hacıqabul, Şirvan, Sabirabad və Salyan rayon Yanğından Mühafizə Hissələrinin texnikaları və şəxsi heyəti cəlb edilib. Operativ müdaxilə nəticəsində yanğın nəzarətə götürülüb, alovun yaxınlıqda yerləşən neft quyularına və fermer təsərrüfatlarına keçməsinin qarşısı alınıb.Hazırda ərazidə yanğının tam söndürülməsi, təhlükənin tam aradan qaldırılması və mümkün yenidən alışma riskinin qarşısının alınması istiqamətində zəruri tədbirlər davam etdirilir.
