Azərbaycanın Xalq artisti, tanınmış kino aktyoru Tofiq Mirzəyev 94 yaşında vəfat edib.
Elpress.az xəbər verir ki, bu barədə APA-ya İsraildə fəaliyyət göstərən Azərbaycan Mədəniyyət Mərkəzinin direktoru Yeganə Salman məlumat verib.Bildirilib ki, sənətkar ötən gecə İsrailin Beer-Şeva şəhərində yerləşən xəstəxanada dünyasını dəyişib.
Onun iki ay əvvəl insult diaqnozu ilə xəstəxanaya yerləşdirildiyi, səhhətinin qısa müddət yaxşılaşmasına baxmayaraq, son günlər yenidən ağırlaşdığı qeyd olunub.
Məlumata görə, Tofiq Mirzəyev sağlığında dəfələrlə Bakıda dəfn olunmaq arzusunu ifadə etsə də, onun İsrailin Araj şəhərindəki qəbiristanlıqda torpağa tapşırılması planlaşdırılır.1932-ci ildə Gədəbəy rayonunda anadan olan Tofiq Mirzəyev Azərbaycan kino sənətinin tanınmış simalarından biri olub. O, 1976-cı ildə Əməkdar artist fəxri adına layiq görülüb, 2022-ci ildə isə Xalq artisti adına və “Şöhrət” ordeninə layiq görülüb.Sənətkar “Nəsimi”, “Üzeyir ömrü”, “O qızı tapın”, “Onun bəlalı sevgisi”, “Uşaqlığın son gecəsi” və “İstintaq” kimi filmlərdə yaratdığı yaddaqalan obrazlarla tamaşaçıların yaddaşında iz qoyub.
