Bu gündən etibarən ümumi təhsil müəssisələrinin direktor vəzifəsinə işə qəbul müsabiqəsinin müsahibə mərhələsinə başlanılıb.
Elpress.az xəbər verir ki, müsahibələrdə iyunun 29-dan iyulun 8-dək keçirilmiş elektron ərizə qəbulu mərhələsində qeydiyyatdan keçən namizədlər iştirak edirlər.
İlkin mərhələdə müsahibələr şagird sayı 500-dək olan ümumi təhsil müəssisələri üzrə şəhər və regional təhsil idarələri tərəfindən təşkil edilir.
Müsabiqə qaydalarına əsasən, namizədlər vakant vəzifələr üzrə ardıcıllıqla müsahibəyə dəvət olunacaq və uyğun namizəd müəyyən edilənədək bu proses davam edəcək.
Müsahibə zamanı iştirakçıların liderlik və strateji idarəetmə, pedaqoji fəaliyyət, idarəçilik və təşkilatçılıq, ünsiyyət bacarıqları, problemlərin həlli və qərarvermə, rəqəmsal savadlılıq, eləcə də sosial və emosional bacarıqları olmaqla 7 əsas meyar üzrə qiymətləndirilməsi aparılacaq.
Müsahibəyə dəvətlə bağlı məlumatlar namizədlərin şəxsi kabinetlərinə mərhələli şəkildə göndərilir. Bu səbəbdən iştirakçılara şəxsi səhifələrini mütəmadi yoxlamaları tövsiyə olunur.
