Masallı şəhərində yerləşən orta məktəblərdən birində şagird kimya dərsi zamanı baş verən hadisə nəticəsində xəsarət alıb. Hadisə sentyabrın 30-da 3 saylı orta məktəbin 8-ci sinfində qeydə alınıb.
Elpress.az xəbər verir ki, hadisə ilə bağlı hazırda araşdırma aparılır.
Məlumata görə, kimya dərsi zamanı keçirilən təcrübə vaxtı istifadə olunan məhlul stolun üzərinə tökülüb. Dərs başa çatdıqdan sonra şagirdlərdən biri dağılan mayeni təmizləmək istəyib.Məhlula toxunduğu zaman onun iyindən gözləri göynəyən şagird ehtiyatsızlıqdan əli ilə gözünü silib. Nəticədə kimyəvi maddə onun gözünə düşüb.Şagird ilkin tibbi yardım göstərilməsi üçün Masallı Rayon Mərkəzi Xəstəxanasına aparılıb. Daha sonra valideynləri tərəfindən Bakıya gətirilən məktəbli burada tibbi müayinədən keçirilib və vəziyyəti qiymətləndirildikdən sonra evə buraxılıb.
Məlumata əsasən, uşaq hadisə zamanı Masallı rayonunda babasının himayəsində olub. Valideynləri Bakıda yaşadıqları üçün hadisədən sonra rayona gələrək övladlarını paytaxta aparıblar.
Daxili İşlər Nazirliyinin Mətbuat Xidmətinin regional qrupundan bildirilib ki, faktla bağlı araşdırma davam etdirilir.
