Bakı Apellyasiya Məhkəməsində müxtəlif ağır cinayətlərə görə məhkum edilmiş Ermənistan vətəndaşlarının apellyasiya şikayətləri üzrə növbəti məhkəmə iclası keçirilib.
Elpress.az xəbər verir ki, İyulun 10-da Bakı Apellyasiya Məhkəməsində Ermənistanın Azərbaycana qarşı hərbi təcavüzü zamanı sülh və insanlıq əleyhinə cinayətlər, müharibə cinayətləri, soyqırımı, terrorçuluq və digər ağır əməllərdə təqsirli bilinərək məhkum olunmuş Arayik Harutyunyan, Arkadi Qukasyan, Bako Sahakyan, Davit İşxanyan, David Babayan, Levon Mnatsakanyan və digər şəxslərin apellyasiya şikayətləri üzrə məhkəmə baxışı davam etdirilib.İclas Bakı Apellyasiya Məhkəməsinin hakimi Elmar Rəhimovun sədrliyi ilə keçirilib. Təqsirləndirilən şəxslər məhkəmədə erməni və rus dillərində tərcüməçi, eləcə də müdafiələrinin təmin olunması məqsədilə vəkillərlə təmin ediliblər. Məhkəmə prosesində zərərçəkmiş şəxslərin nümayəndələri və dövlət ittihamını müdafiə edən prokurorlar da iştirak ediblər.Məhkəmə zamanı Arkadi Qukasyan əvvəlki iclasda başladığı çıxışını davam etdirərək özünü irəli sürülən ittihamlar üzrə təqsirli bilmədiyini bildirib. Daha sonra Vasili Beqlaryanın vəkilləri onun barəsində bəraət hökmü çıxarılmasını və Bakı Hərbi Məhkəməsinin 5 fevral 2026-cı il tarixli hökmünün ləğv edilməsini xahiş ediblər. Vasili Beqlaryan da çıxışında ittihamları qəbul etmədiyini deyib.Bako Sahakyanın müdafiəçiləri də çıxış edərək məhkəmədən hökmün ləğvini və müdafiə etdikləri şəxsə bəraət verilməsini istəyiblər. Bako Sahakyan isə məhkəmədə ona qarşı irəli sürülmüş ittihamlar üzrə özünü təqsirli bilmədiyini bildirib.Növbəti məhkəmə iclasının iyulun 14-də keçirilməsi qərara alınıb. Xatırladaq ki, Bakı Hərbi Məhkəməsinin 5 fevral 2026-cı il tarixli hökmü ilə Arayik Harutyunyan, Levon Mnatsakanyan, David Manukyan, Davit İşxanyan və David Babayan ömürlük azadlıqdan məhrum edilib, digər təqsirləndirilən şəxslər isə müxtəlif müddətlərə həbs cəzalarına məhkum olunublar.
