Xırdalan şəhərinin Ceyranbatan su anbarı istiqamətində yerləşən ərazidə kanalizasiya sularının səviyyəsinin yenidən yüksəlməsi yol hərəkətində ciddi problemlər yaradıb.
Elpress.az xəbər verir ki, ərazidə tullantı sularının toplandığı hissədə aparılan yol-təmir işləri yarımçıq qalıb və yolun vəziyyəti daha da pisləşib.
Məlumata görə, yolun yararsız vəziyyətə düşməsi səbəbindən 135 nömrəli müntəzəm marşrut xəttinin fəaliyyəti də çətinləşib. Xırdalan şəhərinin Həsən Əliyev küçəsində yerləşən, sakinlər arasında “120 yolu” kimi tanınan ərazidə yaranan dərin çalalar və keçilməz vəziyyət müasir tipli alçaqdaban avtobusların hərəkətinə mane olur.
Mövcud vəziyyət xüsusilə Bakı Mühəndislik Universiteti istiqamətində hərəkət edən sərnişinlər üçün ciddi çətinlik yaradır. Yeni tədris ilinin başlanması ilə bu problemin daha da kəskinləşəcəyi bildirilir.Sərnişindaşıma şirkətinin nümayəndələri qeyd edirlər ki, yolun bərpası ilə bağlı aidiyyəti qurumlara dəfələrlə müraciət olunsa da, problem hələ də öz həllini tapmayıb.
Sakinlər isə ərazidə yolun təcili təmir olunmasını və kanalizasiya probleminin aradan qaldırılmasını istəyirlər.
