Həftəsonu çimərliklərdə istirahət etməyi planlaşdıran vətəndaşlara Fövqəladə Hallar Nazirliyi mühüm təhlükəsizlik çağırışı edib.
Elpress.az xəbər verir ki, Yay mövsümünün ən isti günlərində, xüsusilə həftəsonları minlərlə insan dəniz və digər su hövzələrinə üz tutur. Bu səbəbdən Fövqəladə Hallar Nazirliyi vətəndaşlara müraciət edərək çimərliklərdə təhlükəsizlik qaydalarına ciddi əməl etməyin həyati əhəmiyyət daşıdığını bir daha xatırladıb.Nazirlik bildirib ki, aparılan maarifləndirmə tədbirlərinə baxmayaraq, bəzi şəxslərin təhlükəsizlik qaydalarına laqeyd yanaşması hər il suda boğulma və digər bədbəxt hadisələrin baş verməsinə səbəb olur. Bu cür halların qarşısını almaq üçün vətəndaşlar yalnız rəsmi çimərliklərdən istifadə etməli, təhlükəli ərazilərdə suya girməkdən çəkinməlidirlər.FHN-in xəbərdarlığına əsasən, kanal, çay, arx və çimərlik kimi nəzərdə tutulmayan digər su hövzələrində çimmək, işarələnmiş çimmə zonasından kənara üzmək, küləkli hava şəraitində dənizə daxil olmaq, çimərlikdə gecələmək, sərxoş vəziyyətdə suya girmək, suda kobud davranışlar nümayiş etdirmək, eləcə də xilasetmə texnikası istisna olmaqla digər qayıq və kiçik gəmilərlə çimərlik ərazisinə daxil olmaq qəti qadağandır.Nazirlik valideynlərə də xüsusi çağırış edərək vurğulayıb ki, uşaqlar çimərlikdə bir an belə nəzarətsiz buraxılmamalı, xəbərdaredici nişanların tələblərinə və xilasedicilərin göstərişlərinə mütləq əməl edilməlidir. Eyni zamanda, qızmar günəş altında uzun müddət qalmağın və hava qaraldıqdan sonra suya girməyin ciddi təhlükə yaratdığı diqqətə çatdırılıb.Fövqəladə Hallar Nazirliyi bir daha xatırladıb ki, təhlükəsizlik qaydalarına əməl etmək hər bir vətəndaşın öz həyatını və yaxınlarının təhlükəsizliyini qoruması üçün vacibdir. Hər hansı fövqəladə vəziyyətlə qarşılaşdıqda isə vaxt itirmədən 112 qaynar xəttinə zəng edilməsi tövsiyə olunur.
