Elpress.az xəbər verir ki, Azərbaycan Müdafiə Nazirliyinin rəhbər heyəti Hava Hücumundan Müdafiə (HHM) bölmələrinin istifadəsinə verilən yeni hərbi obyektlərə baxış keçirib.
Məlumata görə, Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin diqqət və qayğısı nəticəsində ordunun maddi-texniki təminatı gücləndirilir, müasir standartlara cavab verən hərbi infrastrukturun yaradılması istiqamətində işlər davam etdirilir.Rəhbər heyətə bildirilib ki, respublikanın müxtəlif bölgələrində istifadəyə verilmiş 20-yə yaxın yeni hərbi infrastruktur obyektində şəxsi heyətin xidməti-döyüş fəaliyyəti üçün bütün zəruri şərait yaradılıb. Obyektlər yeməkxana, mətbəx, tibb məntəqəsi, yataqxana, silah otağı, məişət otağı, hamam-sanitar qovşağı, qazanxana, su təchizatı kompleksi, generatorlar, həmçinin müasir rabitə və yanğın təhlükəsizliyi sistemləri ilə təchiz olunub.
Baxış zamanı General-polkovnik Zakir Həsənov hava məkanının etibarlı mühafizəsinin təmin olunması, HHM bölmələrinin döyüş hazırlığının artırılması, eləcə də arsenalda olan müasir silah və texnikanın taktiki-texniki xüsusiyyətlərinin dərindən öyrənilməsi və səmərəli tətbiqi ilə bağlı Hava Döyüş Komandanlığına müvafiq tapşırıqlar verib.
