İki ümumi və bir üz-çənə cərrahının ixtisasına uyğun olmayan əməliyyatlar keçirdiyi müəyyən edilib
Elpress.az xəbər verir ki, Ötən ay tibb müəssisələrində aparılan yoxlamalar zamanı bir sıra qanun pozuntuları aşkarlanıb. Nəticədə 22 klinika və 3 plastik cərrah barəsində inzibati tənbeh tədbirləri tətbiq edilib.Yoxlamalar zamanı müəyyən edilən pozuntular arasında sertifikasiya şəhadətnaməsi olmadan özəl tibbi fəaliyyət göstərilməsi, lisenziyada nəzərdə tutulmayan xidmətlərin göstərilməsi, istifadə müddəti başa çatmış və ya dövlət qeydiyyatından keçməmiş dərmanlardan istifadə olunması, yoxlamaya maneə yaradılması və lisenziyasız tibbi fəaliyyətin həyata keçirilməsi halları yer alıb.Araşdırmalar zamanı daha bir ciddi pozuntu da müəyyən edilib. Belə ki, iki ümumi cərrah və bir üz-çənə cərrahının öz ixtisaslarına uyğun olmayan plastik cərrahiyyə əməliyyatları apardıqları aşkarlanıb. Hər üç faktla bağlı qanunvericiliyin müvafiq maddəsinə əsasən ayrıca protokol hazırlanıb.Mütəxəssislər bildirirlər ki, tibbi xidmətlərin qanunvericiliyin tələblərinə zidd göstərilməsi insanların sağlamlığı və həyatı üçün ciddi risk yarada bilər. Bu səbəbdən tibb müəssisələrində aparılan yoxlamalar zamanı aşkar edilən pozuntularla bağlı qanunvericiliyə uyğun tədbirlər görülür.Aşkarlanmış qanun pozuntuları barədə məlumatların aidiyyəti dövlət qurumlarına təqdim edildiyi və nəzarət tədbirlərinin davam etdirildiyi bildirilib.
