DYP həftəsonu yollarda diqqətli olmağa çağırdı
Elpress.az xəbər verir ki, Baş Dövlət Yol Polisi İdarəsi həftəsonu və yay mövsümü ilə əlaqədar yol hərəkəti iştirakçılarına müraciət edib.Bildirilib ki, bu günlərdə paytaxtdan bölgələrə, turizm və istirahət məkanlarına, eləcə də dənizkənarı ərazilərə gedən yollarda nəqliyyat axınının artacağı gözlənilir. Bu səbəbdən yol-nəqliyyat hadisələrinin başvermə riski də yüksəlir.İdarə sürücülərə hərəkət sürətini yol və hava şəraitinə uyğun seçməyi, uzun yola çıxmazdan əvvəl kifayət qədər dincəlməyi, yorğun vəziyyətdə sükan arxasına əyləşməməyi tövsiyə edib. Həmçinin təhlükəsiz ara məsafəsinin qorunması, riskli ötmələrdən çəkinilməsi və nəqliyyat vasitələrinin texniki sazlığının yoxlanılması tövsiyə olunub.Piyadalardan isə yolu yalnız müəyyən olunmuş keçidlərdən keçmələri və yolu keçərkən mobil telefondan istifadə etməmələri xahiş edilib.
