Kəlbəcərdə işaxtaranlara 90-dan çox vakansiya təqdim olunub
Elpress.az xəbər verir ki, Kəlbəcər rayonunda ilk dəfə əmək yarmarkası təşkil edilib. Tədbir Dövlət Məşğulluq Agentliyi tərəfindən keçirilib və işaxtaran şəxslərin müxtəlif müəssisələrdə mövcud olan vakansiyalarla tanış olmasına şərait yaradılıb.Yarmarkada dövlət və özəl sektoru təmsil edən 16 müəssisə iştirak edib. Vətəndaşlara mühəndis-energetik, böyük mühəndis, xidmət rəisi, elektrik montyoru, qaynaqçı, sürücü, çilingər, qənnadıçı, satıcı, aşpaz və digər peşələr üzrə 90-dan çox iş yeri təklif olunub.Tədbir zamanı işəgötürənlər vakansiyalar üzrə tələblər barədə məlumat verib, uyğun namizədlərin qeydiyyatı həyata keçirilib. İştirakçılar həmçinin aktiv məşğulluq proqramları və onlardan yararlanmaq imkanları barədə məlumatlandırılıblar.Əmək yarmarkası çərçivəsində işəgötürənlərlə ayrıca görüş də keçirilib. Görüşdə məşğulluq sahəsində həyata keçirilən layihələr, o cümlədən Qarabağ və Şərqi Zəngəzur iqtisadi rayonlarında reallaşdırılan aktiv məşğulluq proqramları müzakirə olunub və işəgötürənlərin sualları cavablandırılıb.Tədbirdə Kəlbəcər rayonunda Azərbaycan Respublikası Prezidentinin xüsusi nümayəndəsi Bəşir Hacıyev və Dövlət Məşğulluq Agentliyinin İdarə Heyətinin sədri Hasil Abbasov da iştirak ediblər.
